Il Trentino Book Festival incontra le minoranze linguistiche: la quinta edizione ha parlato del significato di essere un cittadino di minoranza. Fare comunità, è questo l'imperativo dello scrittore cimbro Andrea Nicolussi Golo.

In di Provintz vo Trìa khinta gemacht sidar vünf djar dar uantzege festival von libadar, dar Trentino Book Festival, hergerichtet von feroin Balene di Montagna nidar zo Kalnètsch. A manifestatziong boda sin vodar earstn bòtta izzese auzgenump azpe da bichtegarste okkasiong bodada iz in da ünsar provintz zo maga trèffan groaze schraibar vodar gåntzan bèlt.

In di djar soinda pasàrt zo Kalnètsch dar premio Nobel Dario Fo, Dacia Maraini, un vil åndre. Haür dar Trentino Book Festival, pittnåndar pitt schraibar azpe Stefano Benni, ekonomistn azpe Serge Latouche, gekhennate laüt vo televisiong azpe Paolo Crepet, izta khent gerüaft zo reda vodar Zimbar mindarhait un baz ‘z bill soin gemuant soin a zungmindarhait in dise djar boda alz bill soin gelaich, dar zimbar schraibar Andrea Nicolussi Golo. An abas boda biar Lusérnar håm nètt geböllt vorliarn. Någevorst von djornalist von Trentino Carlo Martinelli, dar Andrea hatt khött bazzez iz vor imen soin a Lusérnar ‘z djar 2015: “I, hatta khött dar schraibar, höarme toal von moin lånt, toal von moin laüt, von soin traditziongen, toal vo moinar zung, un ditza machtme höarn starch un machtme nètt vörtn vo ben ‘z hatta åndre zungen, relidjongen un åndre traditziongen, åntze moi hèrtz, khütta hèrta dar schraibar, iz offe in anìaglan metsch boda süacht zo leba rècht”.

An schümman trèff, pitt vil laüt boda soin gestånt stille zu lüsna siånka azta torthalbe daz schaüla bèttar hatt parìrt schedegen, anvetze iz khent alz no pezzar: niamat izzesse gemövart siånka az hatt gerenk un iz khent khalt. Zo lüsna in schraibar vo Lusérn iztada gest dar vorsitzar von Kulturinstitut Lusérn Gianni Nicolussi Zaiga, ‘z baibe, di prüadar un di sbestarn von Andrea, boden hèrta håm üntarstütz un tortimitt alln in laüt dar psikiatra Paolo Crepet boda an lest hatt gevorst, er gebonnt zo untarschraiba hundartar un hundartar autografe, a dedika aft soin libar in Andrea.